בעפאר מיר גייען דורך די אקטועלע נומערן, דארפן מיר קודם אויסשמועסן א נקודה. עס זענען דא צוויי מארקעטס: א בול מארקעט און א בער מארקעט. א בול מארקעט איז ווען די פרייזן פון שעירס גייען ארויף, און א בער מארקעט איז ווען די פרייזן פון שעירס פאלן. די סיבה פארוואס מענטשן אינוועסטירן אין א בול מארקעט איז ווייל זיי ערווארטן העכערע ווי געווענטליכע ריטורנס אויף זייער פארטפאליא (א פארטפאליא איז דער סאפיסטיקירטער וועג פון זאגן די סטאקס וואס זיי פארמאגן). אבער א מארקעט קראך פאסירט יעדע פאר יאר, און פיל מאל געשעט עס צוליב סיבות וואס מיר קענען נישט פאראויסזאגן, למשל קאוויד, טראמפ'ס טאריפס, אדער א מלחמה. אין רוב פעלער איז א דורכשניטליכע יערליכע ריטורן פון 6-10% פון דיין אינוועסטמענט גוט. די נומער הערט זיך אפשר נישט אזוי מעכטיג ווי וואס רוב מענטשן ערווארטן, אבער געדענק אז פאר דעם דורכשניטליכן ריטעיל אינוועסטירער זאל די סטאק מארקעט נישט געזען ווערן אלס א פלאץ ווי מען קען מאכן אסאך געלט שנעלערהייט. פאר דעם לאנג-טערמיניגן אינוועסטירער איז עס געדולד און אינוועסטירן אין זיין פארטפאליא חודש נאך חודש.

אבער זייט געווארנט, איר וועט אריינקלאפן אין מענטשן איבער די יארן וואס וועלן אייך צוזאגן הויכע ריטורנס אויף אייער געלט. און מיט טרעידינג עפפס ווי ראבינהוד, וואס מאכן עס גאר גרינג פאר מענטשן צו אינוועסטירן אין די סטאק מארקעט, טוען ריטעיל אינוועסטירער אפטמאל אריינגיין בלינדערהייט אן טון א ברעקל פון ריסורטש. איז דא האט איר עטליכע זאכן וואס איר זאלט האלטן אן אויג אפן פאר.

איר וועט אפטמאל הערן די סלענג "קויף די דיפ", און עס איז וויכטיג עס צו פארשטיין: אינוועסטירן קען אפטמאל געטריבן ווערן דורך אונזערע עמאציעס, און ווען מיר זעען אז א סטאק גייט ארויף אין פרייז, וועלן מענטשן אינוועסטירן דערין פשוט ווייל זיי האבן מורא פון ווערן אויסגעלאזט דערפון, און מען קען למעשה מאכן א שלעכטע טרעיד. פון דער אנדערער זייט, ווען א שעיר פאלט אין פרייז, איז דאן די בעסטע צייט צו אינוועסטירן. די "דיפ" איז ווי די געלט ווערט געמאכט.

נומער צוויי, אינוועסטירט נאר וויפיל איר קענט זיך ערלויבן צו פארלירן: א פאפולערע געדאנק וואס מענטשן טוען איז צו אינוועסטירן ארום צען פראצענט פון זייערע פארדינסטן יעדן חודש.

נומער דריי, פאניקט נישט, און פארקויפט נישט די רגע איר זעט ווי אייערע שעירס פאלן אין ווערד: אויב אינוועסטירט איר אויף די לאנג-טערמין, דאן קענט איר ערווארטן בעסערע טעג און ערגערע טעג. עס איז נארמאל, און אויב איז אייער פארטפאליא גענוג דיווערסעפייד, וועט עס נישט שאטן אין די לאנג-טערמין. און געדענקט א וויכטיגע נקודה: מען פארלירט קיינמאל נישט קיין געלט אויף א טרעיד ביז מען פארקויפט עס. דאס מיינט אז אפילו יעצט איז עס אראפ אביסל, אבער ווילאנג איר פארקויפט נישט יעצט, דאן האט איר באמת נישט פארלוירן קיין געלט, ווייל די זעלבע וועג ווי עס איז אראפ היינט, קען עס מארגן צוריק ארויפגיין.